Significance of bride and groom Kundli matching during marriage

ವಧು ವರರ ವಿವಾಹದ ನಿರೀಕ್ಷೆಯನ್ನು ಅಂತಿಮಗೊಳಿಸುವ ಮೊದಲ ಹೆಜ್ಜೆಯೇ ಜಾತಕ ಹೊಂದಾಣಿಕೆ, ಇದು ಪ್ರಮುಖ ಹೆಜ್ಜೆಯೂ ಹೌದು. ವಿವಾಹದಲ್ಲಿ ಜಾತಕ ಹೊಂದಾಣಿಕೆ ಮುಖ್ಯ ಎನ್ನುವುದರ ಬಗ್ಗೆ ಮಾಹಿತಿ ಇಲ್ಲಿದೆ.

ಹಿಂದೂ ವಿವಾಹ ಕ್ರಮದಲ್ಲಿ ವಧುವರಾನ್ವೇಷಣೆಯ ನಂತರ ಗಂಡು ಹೆಣ್ಣಿನ ಜೋಡಿಯನ್ನು ನಿರ್ಧರಿಸುವುದೇ ಜಾತಕ ನೋಡುವ ಮೂಲಕ. ಇತ್ತೀಚಿನ ದಿನಗಳಲ್ಲಿ ಆಧುನೀಕತೆಯ ಕಾರಣದಿಂದಾಗಿ ಕುಂಡಲಿ ಹೊಂದಾಣಿಕೆ ಅಥವಾ ಜಾತಕ ಹೊಂದಾಣಿಕೆಯನ್ನು ನೋಡುವುದನ್ನೇ ಕೆಲವರು ಮರೆತು ಬಿಟ್ಟಿದ್ದಾರೆ, ಇದರಿಂದಾಗಿಯೇ ಕೆಲವೊಂದು ವಿವಾಹ ಸಂಬಂಧಗಳು ಕೂಡಾ ಹೆಚ್ಚು ಕಾಲ ಮುಂದುವರಿಯುತ್ತಿಲ್ಲವೇನೋ, ಸದಾ ಮನಃಸ್ತಾಪ, ಕಲಹಗಳು ವೈವಾಹಿಕ ಜೀವನವನ್ನು ಕಹಿಯಾಗಿಸಬಹುದು. ಇದಕ್ಕಾಗಿಯೇ ಹಿಂದಿನಕಾಲದಿಂದಲೂ ಜಾತಕ ಹೊಂದಾಣಿಕೆ ಮಾಡುವಂತಹ ಸಂಪ್ರದಾಯವು ನಡೆದುಕೊಂಡು ಬಂದಿದೆ. ವಧು ವರರ ವಿವಾಹದ ನಿರೀಕ್ಷೆಯನ್ನು ಅಂತಿಗೊಳಿಸುವ ಮೊದಲ ಹೆಜ್ಜೆಯೇ ಜಾತಕ ಹೊಂದಾಣಿಕೆ, ಇದು ಪ್ರಮುಖ ಹೆಜ್ಜೆಯೂ ಹೌದು. ವಿವಾಹದಲ್ಲಿ ಜಾತಕ ಹೊಂದಾಣಿಕೆ ಯಾಕೆ ಬೇಕು? ಇದರಿಂದಾಗುವ ಪ್ರಯೋಜನಗಳೇನು ಎನ್ನುವುದರ ಕುರಿತು ಹೆಚ್ಚಿನ ಮಾಹಿತಿ ಇಲ್ಲಿದೆ.
                                                                                                                                                                                              *ಜಾತಕ ಹೊಂದಾಣಿಕೆ*

ಕುಂಡಲಿ ಹೊಂದಾಣಿಕೆಯು ಭಾರತದಲ್ಲಿ ವಿಶೇಷವಾಗಿ ಹಿಂದೂ ಧರ್ಮದಲ್ಲಿ ಮದುವೆಯ ಸಾಂಪ್ರದಾಯಿಕ ವಿಧಾನವಾಗಿದೆ. ಜ್ಯೋತಿಷಿಗಳು ಹುಡುಗ ಮತ್ತು ಹುಡುಗಿಯ ಜನ್ಮ ಜಾತಕವನ್ನು ವಿಶ್ಲೇಷಿಸುತ್ತಾರೆ. ದಶಾ ಅಥವಾ ಗ್ರಹಗಳು ಮತ್ತು ಗುಣಗಳ ಅವಧಿಯನ್ನು ಆಧರಿಸಿ ಕುಂಡಲಿಯ ಹೊಂದಾಣಿಕೆ ಮಾಡಲಾಗುತ್ತದೆ. ಜಾತಕವನ್ನು ನೋಡುವಾಗ ಯಾವುದಾದರೂ ದೋಷಪೂರಿತ ಗ್ರಹಗಳಿದ್ದರೆ, ಮದುವೆಯ ಪರಿಹಾರೋಪಾಯಗಳಿಗೆ ಜ್ಯೋತಿಷ್ಯವು ಸಹಾಯ ಮಾಡುತ್ತದೆ.

*​ಜಾತಕ ಹೊಂದಾಣಿಕೆ ಏಕೆ ಮುಖ್ಯ*

ನಮಗೆ ತಿಳಿದಿರುವಂತೆ ಭಾರತೀಯರು ವ್ಯವಸ್ಥಿತ ಸಾಂಪ್ರದಾಯಿಕ ವಿವಾಹ ಪದ್ಧತಿಗೆ ಆದ್ಯತೆಯನ್ನು ನೀಡುತ್ತಾ ಬಂದವರು. ನಮಗೇ ಗೊತ್ತಿಲ್ಲದ, ಹಿಂದೆಂದೂ ಭೇಟಿಯಾಗದ ವ್ಯಕ್ತಿಯನ್ನು ವಿವಾಹವಾಗುವುದು ಸ್ವಲ್ಪ ಕಷ್ಟ. ಹಾಗಾಗಿ ವಿವಾಹವನ್ನು ಅಂತಿಮಗೊಳಿಸುವ ಮೊದಲು ಇಬ್ಬರ ಕುಂಡಲಿಗಳನ್ನೂ ಹೊಂದಾಣಿಕೆ ಮಾಡಿ ನೋಡಲಾಗುತ್ತದೆ. ಈ ಸಮಯದಲ್ಲಿ ವಧುವರರ ಜಾತಕವನ್ನು ಪರಿಗಣಿಸಿ ಇವರ ಜೀವನವು ಸಂತೋಷದಿಂದಿರುವುದೇ ಹಾಗೂ ದಾಂಪತ್ಯ ಜೀವನವು ಯಶಸ್ವಿಯಾಗುವುದೇ ಎಂದು ನೋಡಲಾಗುತ್ತದೆ. ಮದುವೆಗೂ ಮೊದಲು ಕುಂಡಲಿಯ ಹೊಂದಾಣಿಕೆಗೆ ಇನ್ನೊಂದು ಮುಖ್ಯ ಕಾರಣವೆಂದರೆ ವಿವಾಹ ಹೊಂದಾಣಿಕೆ. ಜ್ಯೋತಿಷ್ಯಶಾಸ್ತ್ರದಲ್ಲಿ ಒಟ್ಟು 36 ಗುಣಗಳಿವೆ. ಅವುಗಳಲ್ಲಿ ವಧು ವರರು ಎಷ್ಟು ಹೊಂದಾಣಿಕೆ ಮಾಡಿಕೊಳ್ಳುತ್ತಾರೆ ಮತ್ತು ಅವರ ಜೀವನವು ಎಷ್ಟು ನೆಮ್ಮದಿಯಿಂದ ಕೂಡಿರುತ್ತವೆ ಎಂಬುದನ್ನು ನಿರ್ಧರಿಸಲಾಗುತ್ತದೆ. ಒಂದು ವೇಳೆ ಗುಣಗಳ ಸಮಸ್ಯೆಗಳಿದ್ದರೆ ಜ್ಯೋತಿಷಿ ವಿವಿಧ ಪರಿಹಾರವನ್ನೂ ನೀಡಬಹುದು. ಮಕ್ಕಳ ಸಂತೋಷ ಹಾಗೂ ಆರೋಗ್ಯವನ್ನು ನೋಡಲು ಕುಂಡಲಿ ಹೊಂದಾಣಿಕೆ ಮುಖ್ಯವೆಂದು ಪರಿಗಣಿಸಲಾಗುತ್ತದೆ. ಉದಾಹರಣೆಗೆ ನಾಡಿಯಲ್ಲಿ, ಎಂಟನೇ ಗುಣವು ಹೆರಿಗೆಯ ಸಾಧ್ಯತೆಗಳನ್ನು ಹಾಗೂ ಅದರಲ್ಲಿ ಏನಾದರೂ ಸಮಸ್ಯೆಗಳಿದ್ದರೆ ಸೂಚಿಸುತ್ತದೆ.

*​ದೈಹಿಕ ಮತ್ತು ಮಾನಸಿಕ ಹೊಂದಾಣಿಕೆ*

ವಧೂ ವರರ ದೈಹಿಕ ಮತ್ತು ಮಾನಸಿಕ ಹೊಂದಾಣಿಕೆಯನ್ನು ಖಚಿತ ಪಡಿಸಿಕೊಳ್ಳಲೂ ಕುಂಡಲಿ ಹೊಂದಾಣಿಕೆಯ ಪ್ರಯೋಜನ ಪಡೆದುಕೊಳ್ಳಲಾಗುತ್ತದೆ. ಇಬ್ಬರು ಸಂಗಾತಿಗಳ ಜಾತಕದಲ್ಲಿ ಗ್ರಹಗಳ ಸ್ಥಾನಗಳು ಅವರ ನಡವಳಿಕೆಗಳನ್ನು ಸೂಚಿಸುತ್ತದೆ. ಆದ್ದರಿಂದ ಜಾತಕ ಹೊಂದಾಣಿಕೆಯು ದಂಪತಿಗಳ ಮನಃಸ್ಥಿತಿ, ಆಸಕ್ತಿ, ವರ್ತನೆ, ನಡವಳಿಕೆ ಮತ್ತು ಇತರ ವಿಷಯಗಳನ್ನು ತಿಳಿಸುತ್ತದೆ. ಹುಡುಗ ಹುಡುಗಿಯ ಆರೋಗ್ಯ ಮತ್ತು ಯೋಗಕ್ಷೇಮವನ್ನೂ ಸಹ ಇಲ್ಲಿ ಮೌಲ್ಯಮಾಪನ ಮಾಡಲಾಗುತ್ತದೆ. ಹುಡುಗ ಹುಡುಗಿಯ ಮಧ್ಯೆ ಸಾಕಷ್ಟು ದೈಹಿಕ ಆಕರ್ಷಣೆ ಇದೆಯೇ ಎನ್ನುವುದನ್ನೂ ಕೂಡಾ ಇಲ್ಲಿ ಖಚಿತಪಡಿಸಿಕೊಳ್ಳಲಾಗುತ್ತದೆ.

*​ದೆಸೆಗಳ ಪರಿಣಾಮ*

ನಕ್ಷತ್ರಗಳ ಸಮಯ ಮತ್ತು ಸ್ಥಾನವು ಕೆಲವೊಮ್ಮೆ ವ್ಯಕ್ತಿಯ ಜಾತಕದಲ್ಲಿ ಶನಿ ದೆಸೆ ಅಥವಾ ಮಂಗಲ ದೆಸೆಯನ್ನು ರಚಿಸಬಹುದು. ಕುಂಡಲಿ ಹೊಂದಾಣಿಕೆಯ ಸಹಾಯದಿಂದ ಈ ದೆಸೆಗಳ ಪರಿಣಾಮಗಳನ್ನು ಕಡಿಮೆ ಮಾಡಬಹುದು. ಅನುಭವೀ ಜ್ಯೋತಿಷಿಗಳಾದರೆ ದಂಪತಿಗಳ ಕುಂಡಲಿಯಲ್ಲಿ ದೆಸೆ ಮತ್ತು ಕೆಟ್ಟ ಯೋಗಗಳು ಹಾಗೂ ಋಣಾತ್ಮಕ ಪರಿಣಾಮಗಳನ್ನು ಕಡಿಮೆ ಮಾಡಲು ಸಹಾಯ ಮಾಡುವ ಕೆಲವೊಂದು ಪರಿಹಾರಗಳನ್ನೂ ಸೂಚಿಸುತ್ತಾರೆ. ಕುಂಡಲಿ ಹೊಂದಾಣಿಕೆಯ ಮೂಲಕ ಆರ್ಥಿಕ ಸ್ಥಿರತೆ ಮತ್ತು ವೃತ್ತಿ ಭವಿಷ್ಯವನ್ನೂ ನಿರ್ಧರಿಸಲಾಗುತ್ತದೆ. ವೈದಿಕ ಜ್ಯೋತಿಷ್ಯದ ಪ್ರಕಾರ ಗ್ರಹಗಳ ಚಲನೆ ಮದುವೆ ನಂತರ ವ್ಯಕ್ತಿಯ ಜೀವನದ ಮೇಲೆ ಮಾತ್ರವಲ್ಲದೇ ಸಂಗಾತಿಯ ಜೀವನದ ಮೇಲೂ ಪರಿಣಾಮ ಬೀರುತ್ತದೆ. ಹಾಗಾಗಿ ಪ್ರತಿಯೊಬ್ಬ ಪೋಷಕರೂ ಕೂಡಾ ತಮ್ಮ ಮಕ್ಕಳ ಮದುವೆಯಲ್ಲಿ ಆರ್ಥಿಕವಾಗಿ ಸ್ಥಿರವಾಗಿರುವ ಸಂಗಾತಿಯನ್ನೇ ಹುಡುಕುತ್ತಾರೆ.

*​ಹೊಂದಿಕೆಯಾಗುವ ಗುಣಗಳ ಮಹತ್ವ*

ವೈದಿಕ ಜ್ಯೋತಿಷ್ಯ ಪ್ರಕಾರ ಹುಡುಗ ಹುಡುಗಿಯ ಹೊಂದಾಣಿಕೆಯನ್ನು ಪರೀಕ್ಷಿಸಲು ಒಟ್ಟು 36 ಗುಣಗಳಿವೆ. ಅಷ್ಟಕೂಟ ಹೊಂದಾಣಿಕೆಯ ಅಡಿಯಲ್ಲಿ ಒಟ್ಟು ಅಂಕಗಳ ಸಂಖ್ಯೆಯಲ್ಲಿ 36 ಗುಣಗಳನ್ನು ಪರಿಗಣಿಸಲಾಗುತ್ತದೆ. ಸಂತೋಷ ಹಾಗೂ ಯಶಸ್ವೀ ದಾಂಪತ್ಯಕ್ಕಾಗಿ 36 ಗುಣಗಳಲ್ಲಿ ಒಟ್ಟು 18 ಗುಣಗಳ ಹೊಂದಾಣಿಕೆ ಇರಬೇಕು. 18 ರಿಂದ 25 ಗುಣಗಳನ್ನು ಮದುವೆಗೆ ಉತ್ತಮ ಹೊಂದಾಣಿಕೆಯೆಂದು, 25ರಿಂದ 25 ಗುಣಗಳ ಹೊಂದಾಣಿಕೆಯನ್ನು ಅತ್ಯುತ್ತಮವೆಂದೂ, 32 ರಿಂದ 36 ಗುಣಗಳನ್ನು ಅದ್ಭುತ ಹೊಂದಾಣಿಕೆಯಂದು ಪರಿಗಣಿಸಲಾಗುತ್ತದೆ. ವೈವಾಹಿಕ ಜೀವನಕ್ಕೆ ಕಾಲಿಟ್ಟ ನಂತರ ದಂಪತಿಗಳು ಜೊತೆಯಾಗಿ ಆನಂದದಾಯಕ, ಸಮೃದ್ಧ ಮತ್ತು ಸುದೀರ್ಘ ದಾಂಪತ್ಯ ಜೀವನವನ್ನು ನಡೆಸಬೇಕೆನ್ನುವುದು ಕುಂಡಲಿ ಅಥವಾ ಜಾತಕ ಹೊಂದಾಣಿಕೆಯ ಮುಖ್ಯ ಉದ್ದೇಶ.